අහසේ කලු පැහැති ඡායාවක් ලෙසින් දිස් වූ වස්තුව කෙමෙන් මිතුරන් තිදෙනාගේ දර්ශනපථයට හසු විය.
" භූතාරක්ෂකයෙක් ද?" රොන් යළිත් කලබලයට පත්ව පැවසීය.
මෙම වසංගත තත්ත්වය තුළ භූතාරක්ෂකයන්ගේ ග්‍රහණයට හසු වීම මහත් හිරිහැරයක් වනු ඇත. රොන් වඩාත් බිය වූයේ භූතාරක්ෂකයන්ගේ හාද්ද සම්බන්ධයෙන් අසා තිබූ කතාවන් වලට ය. එවැනි හාදුවකින් වුව කොරෝනා වෛරසය වැළඳිය හැකි බව සිහිවූ රොන්ගේ සියොලඟ කිලිපොළා ගියේය.
"ඒ එන වේගේ හැටියට නම් එරොල් වගේ" හර්මොයිනි කවුළුවෙන් ඉවතට මුහුණෙ යොමා පැවසුවාය .
ඇයගේ කියමන සැබෑ කරමින් රොන්ගෙ සුරතල් බස්සා කවුළුවෙන් කාමරයට ඇතුලු විය. රොන් යුහුසුළුව සැනිටයිසර් යොදා බස්සාගේ පාද සෝදා ඔහු රැගෙන ආ පාර්සලය දිග හැරියේය. බස්සා ජනෙල් පඩිය මතට වී ගිමන් හැරීමට පටන් ගත්තේ සිහින් කෙඳිරියක් ද නංවමිනි.
" රොන් මොනවද ඕකෙ තියෙන්නෙ" හැරී අසුනින් නැගිට මීටරයක් ඈතින් රොන් ළඟින් සිට ගත්තේය.
" ෂා කෑම මතක් කරා විතරයි.අපේ අම්මා වට්ටක්කා කේක් සමඟ චොකලට් ගෙම්බො පාර්සලයක් එවලා" රොන් සතුටින් කෑ ගැසුවේය.
" මේක නම් හරිම රස පාටයි" සති ගණනාවකින් කේක් ගෙඩියක් දුටු හර්මොයිනිගේ මුහුණ සැණෙකින් ආලෝකවත් විය.
" ග්‍රින්ග්‍රොට්ස් බැංකුවේ සල්ලි විතරක් තිබ්බට වැඩක් නෑ. හොඳට උයන්න පුලුවන් නැන්දම්මා කෙනෙක් ලබන්නත් පින් කරන්න ඕනේ" රොන් කීවේය.
" කාටද ඒක කිව්වෙ රොන්?" හැරී දඟකාර සිනාවක් පාමින් විමසුවේය.
" එක්කෙනෙකුට නෙවෙයි. ඔය දෙන්නටම! "
මුව ආවරණය පහත් කළ රොන් කේක් කැබැල්ලක් මුවට ඇතුළත් කරනවාත් සමඟම පාවහන් ගැටෙන හඬක් ඔවුන්ගේ සවනත වැකිණි.
සියුම් තට්ටු කිරීමක් සමඟ මහාචාර්ය ඩම්බල්ඩෝර් කාමරයට ඇතුලු විය.
ග්‍රිෆින්ඩොර් නිවාසයෙන් මම මේ නම් කියවන අය තම තමන්ගේ මාස්ක්, සැනිටයිසර් සහ මායා යෂ්ටි අරගෙන ප්‍රධාන ශාලාවට එන්න.
" ඔලිවර් වුඩ්, නෙවිල් ලෝන්ග්බොටම්, හර්මොයිනි ග්‍රේන්ජර්, හැරී පෝටර්, ජිනී වීස්ලි"
" බලනවා මම නෑ . දැන් මට තනියම තමා ඉන්න වෙන්නෙ, හැරීට නම් මොකද ජිනීගෙ නමත් කිව්වෙ" රොන් හර්මොයිනිගේ කණට කෙඳිරුවේය.
" සහ අවසාන වශයෙන් රොන් වීස්ලි" යි පැවසූ ඩම්බල්ඩෝර් සිය උපැස් යුවළ සකසා ගෙන පිටත්ව ගියේය.
" දෛවය එච්චරටම කුරිරු නෑ" මද සිනහවක් මුවෙහි ඇදෙද්දී රොන් තමාටම කියාගත්තේය.
© ධරණී උපේකා වීරසේකර
No comments:
Post a Comment